Avammut tunisanut kisitsisit
Siunertaq
Saqqummersitap siunertaraa piaarnerusumik aalisarnermiit avammut tunisartakkat tamanut paasissutissiissutiginissaat.
Imarisaa
Saqqummersitami ilaatinneqarput avammut tunisat aalisarnermik aallutaqartuninngaaneersuinnaat. Tunisassiat allat, assersuutigalugu puisininngaaneersut, savaninngaaneersut uumasunillu allaneersut saqqummersitami taamaalillutik ilaatinneqanngillat.
Najoqqutaq
Saqqummersitami paasissutissat toqqammavigineqartut ukioq 2020-meersut, Akileraartarnermut aqutsisoqarfiup Akitsuuseriffianit pissarsiaapput.
Iluarsiissuteqarneq
Una saqqummersitaq iluatsillugu maajip 20-ani saqqummersitaq Nunanut allanut niuerneq 1. kvartal 2020 iluarsiissuteqarfigineqarpoq. Iluarsiissuteqartariaqalerneq pissuteqarpoq, Akileraartarnermut Aqutsisoqarfimmut nunanut allanut tunisinermi nalunaartussaatitaanermut tunngasut kingusinaartumik qarasaasianut ikkussuunneqarsimammata.
Avammut tunisat nalingi 8,9 pct.-imik annikilleriartut
2020-mi januaarimiit apriili ilanngullugu avammut tunisat nalingi katillugit 1.179 mio. kr.-usimapput. Ukiup siuliani piffissamut tassunga sanilliullugit 115 mio. kr.-inik annikinnerupput, annikilleriarnerlu 8,9 pct.-iuvoq.
Oqimaassuseq akillu appartut
Nunanut allanut tunisaasartut pingaarnerit nalingisa apparnerat tunisakinnerulernermik aammalu tunisat akimikkut appariaallassimanerannik pissuteqarpoq. Tamanna tabelini 1-3 takuneqarsinnaavoq.
Titartagaq 1. Aalisakkat avammut tunisaanerat, mio. kr.
Najoqqutaq: http://bank.stat.gl/IENEXPMND |
Titartagaq 2. Aalisakkat pingaarnerit avammut tunisaanerat qaammatikkaarlugu, mio. kr.
Najoqqutaq: http://bank.stat.gl/IENEXPMND |